रौतहट । गाउँपालिका/नगरपालिकाको कार्यप्रक्रिया र उपलब्धिको लेखाजोखा गरी शासकीय पद्धति र विकास व्यस्थापनमा गर्नुपर्ने सुधारका क्षेत्रहरू पहिचान गर्ने, आवधिक समीक्षाको आधार प्राप्त गर्ने र स्थानीय सरकारबीच स्वस्थ प्रतिष्पर्धाको भावना जागृत गराउने उद्देश्यले कार्यान्वयनमा रहेको स्थानीय तह संस्थागत क्षमता स्वमूल्याङ्कनको आ.व. २०८०/८१ को नतिजाको गुणस्तर परीक्षणको कार्य सम्पन्न गरी सङ्घीय मामिला मन्त्रालयले अन्तिम नतिजा प्रकाशन गरेको छ ।
स्थानीय तह संस्थागत क्षमता स्वमूल्याङ्कनका प्रत्येक विषयगत क्षेत्रका लागि निश्चित अंकभार तोकिएको छ । सेवा प्रवाह क्षेत्रलाई सबैभन्दा बढी १६ अंक र सहकार्य तथा समन्वय क्षेत्रलाई सबैभन्दा कम ६ अंक निर्धारण गरिएको छ । यसैगरी अन्य विषयगत क्षेत्रहरू क्रमशः संगठन तथा प्रशासनलाई ९ अंक, शासकीय प्रबन्धलाई ८ अंक, वार्षिक बजेट तथा योजनालाई ११ अंक, वित्तीय तथा आर्थिक व्यवस्थापनलाई ११ अंक, न्यायिक कार्यसम्पादनलाई ७ अंक, भौतिक पूर्वाधारलाई १३ अंक, सामाजिक समावेशीकरणलाई १० अंक र वातावरण तथा विपद् व्यवस्थापनलाई ९ अंक गरी जम्मा १०० अंकभार रहेको छ । ती सूचकहरूलाई हरेक विषय क्षेत्रमा समग्र अवस्था, प्रक्रियागत अवस्था र परिमाणात्मक अवस्था गरी तीन तहमा व्यवस्थित गरिएको छ ।
प्रत्येक विषयगत क्षेत्रका सूचकहरुलाई समग्र अवस्थामा २१ अंक, प्रक्रियागत अवस्थामा ३४ अंक र परिमाणात्मक अवस्थामा ४५ अंक निर्धारण गरिएको छ । स्थानीय तहको सबल र दुर्बल पक्षहरुको विश्लेषण गर्ने प्रयोजनका लागि स्थानीय तह संस्थागत क्षमता स्वमूल्याङ्कन कार्यविधि, २०७७ अनुसार स्वमूल्याङ्कनको नतिजालाई पौष मसान्तसम्म कार्यपालिकाबाट स्वीकृत गरी वेबसाइट र सूचनापाटी मार्फत सार्वजनिक गर्नुपर्ने व्यवस्था रहेक छ ।
मन्त्रालयद्वारा प्रकाशित अन्तिम नतिजामा रौतहटका १५ वटा स्थानीय तहहरुले मात्र आ.व. २०८०/८१ को संस्थागत क्षमता स्वमूल्यांकन गरेको देखिएको छ । संस्थागत क्षमता स्वमूल्यांकनमा चन्द्रपुर नगरपालिकाले ७४.५० अंक, गौर नगरपालिकाले ७३.० अंक, गरुडा नगरपालिकाले ७१.७५ अंक, राजदेवी नगरपालिकाले ६६.७५ अंक, राजपुर नगरपालिकाले ६२.० अंक, बौधीमाई नगरपालिकाले ६१.० अंक, गुजरा नगरपालिकाले ५८.२५ अंक, वृन्दावन नगरपालिकाले ५६.५० अंक, ईशनाथ नगरपालिकाले ५४.७५ अंक, दुर्गा भगवती गाउँपालिकाले ५४.० अंक, परोहा नगरपालिकाले ५०.२५ अंक, माधव नारायण नगरपालिकाले ४९.२५ अंक, देवाही गोनाही नगरपालिकाले ४७.२५ अंक, मौलापुर नगरपालिकाले ४३.२५ अंक र फतुवा बिजयपुर नगरपालिकाले ३५.२५ अंक प्राप्त गरेका छन् । बाँकी तीन वटा स्थानीय तहहरु गढीमाई नगरपालिका, कटहरिया नगरपालिका र यमुनामाई गाउँपालिकाले संस्थागत क्षमता स्वमूल्यांकनको नतिजा सार्वजनिक नगरेको देखिएको छ । रौतहटमा १८ वटा स्थानीय तहहरु रहेका छन् ।
-1739788603.png)
